KJÆRAST

Nobelprisvinnar Jon Fosses einaste originalskrivne spelefilmmanus blir no film. Manuskriptet til Kjærast byggjer ikkje på Fosses
litterære eller dramatiske utgivingar, men er ei originalhistorie skriven for film og Erik Poppe.

Filmen er ei sår, visuell og sterk historie om kjærleiken og krafta i lengten.
Asle og Gerd finn kvarandre i ein liten kystby lengst vest ut mot havet. Dei blir foreldre til ein gut, og for ei stund er lykka fullkommen. Men Asle er ikkje like rotfesta som Gerd. Som sjømann søkjer han seg vekk.

Gerd er tilbake i det vesle huset, åleine med barnet, medan avstanden mellom henne og Asle veks. I Fosses særeigne, minimalistiske stil, blir det usagde formidla gjennom knapp dialog, blikk, overraskande skift, stilla og eit brutalt, vakkert landskap. Framdrifta i historia ligg ikkje i ei ytre dramatisk
handling, men i ein sterk sympati for lagnaden til dei tre, Gerd, Asle og guten. Einsemda tærer, kjærleiken falmar, og i skuggen av
havet blir det ubønhøyrlege spørsmålet stilt: Kor mykje avstand toler kjærleiken?

Om skodespelarane
Leo Magnus de la Nuez (Asle) er utdanna ved Teaterhøgskolen, KHiO (2014–2017). Leo debuterte ved Trøndelag Teater i rolla som
Josef i Juleevangeliet – The Smash Hit Musical i 2017. Frå 2020 til 2024 har han vore tilsett ved Rogaland Teater. Han er no fast
tilsett ved Det Norske Teatret. Leo har skrive og medverka i NRK-serien BMI – Turné (2016). Han har òg, saman med
improvisasjonsteatergruppa Berre Moro Impro (BMI), skrive og medverka i Verdens Beste Show, som hadde premiere på
hovudscena på Latter i Oslo hausten 2019. Leo har også medverka i TV-seriane Mysteriet på Sommerbåten (NRK, 2015),
Heimebane (NRK, 2018–2019), Beforeigners (HBO, 2019–2022), Livstid (NRK, 2020) og Evy og alltid (NRK, 2023).
Kristi-Helene Giæver Engeberg (Gerd) er utdanna ved Norsk Skuespillerinstitutt, der ho studerte skodespel for teater og film
(2014–2017). Ho er også utdanna innanfor dans på Bårdar Akademiet (2011–2013). Ho har sidan 2018 vore tilsett ved Den
Nationale Scene i Bergen, der ho har medverka i m.a. Wendy og Peter Pan, Namnet, Kuk, Onkel Vanja og Ein dokkeheim. Ho har
hatt roller i filmar som Krigsseileren (2022) og La Elva Leve (2023).

Om Paradox
Paradox er eit norsk produksjonsselskap grunnlagt i 1998. Selskapet har markert seg som ei sentral kraft i norsk film gjennom ei
rekkje produksjonar som både har vunne prisar og nådd eit breitt publikum. Paradox’ filmografi inneheld m.a. Quislings siste dager
(2024), Kongens nei (2016), og Utøya 22. juli (2018). Selskapet har styrkt posisjonen sin som leverandør av kvalitetsdrama med
sterk emosjonell kraft. Paradox har også produsert TV-seriane I kjærlighetens navn (2025) og Harald og Sonja (2025) for Prime
Video, og dessutan Quisling (2024) for TV 2. Med filmar som kombinerer kunstnarisk ambisjon og publikumsappell, har Paradox
vunne fleire Amanda-prisar, vore med på Berlinalen og representert Noreg i Oscar-samanheng. Selskapet er i dag eit av dei mest
anerkjende i norsk filmproduksjon.

Om SF Studios
SF Studios vart etablert i 1919. Med meir enn hundre års røynsle er SF Studios i dag eitt av dei leiande filmstudioa i Norden, med
hovudkontor i Stockholm og kontor i Oslo, København og Helsingfors. Selskapet produserer og distribuerer filmar og TV-seriar, og
er ein stor aktør på heimemarknaden med strøymetenestene SF Anytime og Blockbuster. Dei norske produksjonsselskapa til SF
Studios er Paradox og Motion Blur. SF Studios er ein del av det leiande nordiske medieselskapet Bonnier.